Şu gün, 10-njy oktýabrda Aşgabatda «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi we ylmy maslahat öz işine başlady. 12-nji oktýabra çenli dowam etjek bu çäre däp boýunça Türkmenistanyň Saglygy goraýyş we derman senagaty işgärleriniň güni mynasybetli guralýar.

Prezident Serdar Berdimuhamedowa «Türkmenistanyň at gazanan arhitektory» diýen hormatly at dakyldy. «Watan» habarlar gepleşiginde habar berlişi ýaly, şu gün Türkmenistanyň Mejlisiniň degişli karary kabul edildi.

Türkmenistanyň Demir ýol ulaglary ministrligi bilen Birleşen Arap Emirlikleriniň «Etihad Rail» kompaniýasy Abu-Dabi şäherinde geçirilen «Global Rail» halkara sergisiniň çäklerinde özara düşünişmek hakynda Ähtnama gol çekdiler. Bu barada Türkmenistanyň Demir ýol ulaglary ministrliginiň metbugat gullugy habar berýär.

4-6-njy oktýabry aralygynda Germaniýanyň Bielefeld şäherinde Ýetginjekleriň arasynda mental hasaplamak boýunça Dünýä çempionaty geçirildi. Oňa ýurdumyzyň okuwçylarynyň sekizisi gatnaşyp, üstünlikli çykyş etdi. Bu barada “Kämil bilim” okuw merkezinde habar berdiler.

2025-nji ýylyň 3–4-nji noýabry aralygynda Hazar deňziniň kenaryndaky «Awaza» milli syýahatçylyk zolagynda «Türkmenistanyň gurluşyk, senagat, himiýa we energetika pudaklarynyň ösüşi» atly halkara maslahaty (CIET 2025) geçiriler. Bu giň gerimli foruma dünýäniň 40 ýurdunyň wekilleri — ministrler, halkara kompaniýalarynyň ýolbaşçylary, maliýe institutlarynyň we innowasion başlangyçlaryň wekilleri gatnaşarlar. Bu çärä jemi 500-den gowrak wekiliň gatnaşmagyna garaşylýar.

Şu gün — Hatyra gününde Türkmenistanyň Prezidenti Serdar Berdimuhamedow «Halk hakydasy» ýadygärlikler toplumyna gül goýmak çäresine gatnaşdy. Bu barada «Watan» habarlar gepleşiginde habar berildi.

Türkmenistanda 1948-nji ýyldaky Aşgabat ýertitremesinde pida bolanlar, Watany goramak ugrundaky söweşlerde wepat bolanlar we 1941-1945-nji ýyllardaky Beýik Watançylyk urşunyň söweş meýdanlarynda gurban bolanlar ýatlanyp, Hatyra güni bellenýär.

Türkmenistanyň Magtymguly adyndaky Ýaşlar guramasynyň Merkezi geňeşiniň ýanyndaky «Arkadagly Ýaşlar» žurnalynyň döredijilik topary bu elektron neşiriň sentýabr aýyndaky sanyny okyjylara hödürledi. Bu barada TDH habar berdi.

Türkmenistanda ilkinji gezek maýyplygy bolan çagalary yzygiderli ýagdaýda umumybilim berýän ulgama goşmagy maksat edinýän synag taslamasy işe girizilýär.

Şu gün Türkmenistanyň Prezidenti Serdar Berdimuhamedow sanly ulgam arkaly Hökümet mejlisini geçirdi. «Watan» habarlar gepleşiginde habar berlişi ýaly, mejlisde şu ýylyň dokuz aýynda ýurtda alnyp barlan işleriň jemleri jemlenildi.

Balkan welaýatynyň Türkmenbaşy şäherindäki «Awaza» milli syýahatçylyk zolagynda ýerleşýän Awaza döwlet elektrik stansiýasy indi birnäçe ýyl bäri diňe Balkan welaýatyny däl, eýsem, ýurduň beýleki welaýatlaryny hem elektrik energiýasy bilen bökdençsiz üpjün edip gelýär. Bu barada «Türkmenistan» gazetinde habar berildi.

Geçen awgust aýynda Türkiýe daşary ýurtlara harytlaryň we hyzmatlaryň 21 milliard 729 million dollara deň möçberini ýerledi, import 25 mlrd 940 mln dollary düzdi. Bu barada ýurduň Söwda ministrligine we Statistika institutyna salgylanýan «Azertaj» portaly habar berdi. Türkiýäniň öňdebaryjy söwda hyzmatdaşy Germaniýa bolup durýar. Ýanwar-awgustda german bazaryna türk eksporty 14 mlrd 651 mln dollary düzdi. Ilkinji bäşlige şeýle-de Beýik Britaniýa, ABŞ, Italiýa we Yrak girdi. Bu ýurtlaryň paýyna ähli türk eksportunyň 29,6 göterimi degişli boldy. Türkiýä iň köp haryt getirýänleriň sanawynyň başyny Hytaý çekdi, ol ýerden ýurda 32 mlrd 49 mln dollarlyk haryt getirildi. Ondan soňra Russiýa (28,5 mlrd dollardan gowrak), Germaniýa, ABŞ we Italiýa gelýär. Bu döwletlere türk importunyň 43,2 göterimi degişli boldy.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow düýn Arkadag şäherine iş saparyny amala aşyrdy.

13 — 20-nji sentýabr aralygynda Türkmen oba hojalyk institutynyň şeýle-de S.A.Nyýazow adyndaky Türkmen oba hojalyk uniwersitetiniň oba hojalygyny mehanizmleşdirmek hünäriniň talyplary hem-de olaryň mugallymlary Germaniýada we Niderlandlarda önümçilik tejribeligini geçdiler.

Düýn Türkmenistanyň Garaşsyzlygynyň 34 ýyllyk baýramy mynasybetli Aşgabatda badalga alan baýramçylyk dabaralary ýurduň ähli künjeklerinde dowam edip, raýatlaryň kalbyny baýramçylyk şatlygy hem-de buýsanç duýgulary bilen doldurdy. TDH-niň habar berşi ýaly, ýurduň Garaşsyzlygynyň 34 ýyllygy mynasybetli dabaralar agşam “Älem” medeni-dynç alyş merkeziniň öňündäki meýdançada geçirilen konsert bilen dowam etdi. Bu ýere ýygnanan köp sanly tomaşaçylaryň öňünde meşhur hem-de ýaş artistler, folklor-tans toparlary öz ussatlyklaryny görkezdiler. Baýramçylyk feýerwerki Garaşsyzlyk baýramyna bagyşlanan dabaralaryň özboluşly jemlenmesine öwrülip, Aşgabadyň gijeki asmanyna ajaýyp baýramçylyk öwüşginini çaýdy.

25-nji sentýabrda General-admiral F.M.Apraksin adyndaky Hazar deňiz we derýa ulaglary institutynda Türkmenistanyň Garaşsyzlygynyň 34 ýyllygy mynasybetli aýdym-sazly medeni çäre geçirildi. Bu barada Türkmenistanyň DIM-niň resmi saýtynda habar berildi. Çärä Türkmenistanyň Russiýa Federasiýasyndaky (Astrahan şäheri) konsuly, Astrahan oblastynyň Daşary aragatnaşyklar ministrliginiň we Russiýa Federasiýasynyň Daşary işler ministrliginiň Astrahan oblasty boýunça wekilhanasynyň wekilleri hem-de institutyň professor-mugallymlarydyr talyp ýaşlary gatnaşdylar. Şeýle-hem, agzalýan çärä Funtowo obasynda ýerleşýän Magtymguly Pyragy adyndaky orta mekdebiniň okuwçylary gatnaşdylar.  Konsul G.Ilamanow öz çykyşynda Türkmenistanyň hemişelik Bitaraplygynyň ähmiýeti, Garaşsyz Türkmenistanyň 34 ýylyň içinde ýeten belent sepgitleri, gazanylan üstünlikleri hem-de golaýda geçirilen Türkmenistanyň Halk Maslahatynyň mejlisiniň ähmiýeti barada gatnaşyjylara gürrüň berdi. Şeýle hem, ylym-bilim, medeni-ynsanperwer ugurlary boýunça türkmen-rus gatnaşyklaryna syn berdi. Soňra çäre goşgularyň çeper okaýşy, türkmen halk aýdymlarynyň we dutar milli saz guralynda sazlaryň ýerine ýetirilmegi bilen dowam etdirildi. Çäre küştdepdi türkmen milli tansy bilen jemlendi. Geçirilen medeni çäräniň çäklerinde Türkmenistanyň konsuly we Hazar institutynyň direktory O.Kartaşowa bilen bu ýokary okuw jaýynda bilim alýan Türkmenistanly talyplar bilen terbiýeçilik ähmiýetli wagyz-nesihat duşuşygyny geçirdiler.

15 — 20-nji sentýabr aralygynda Türkmenistanyň Aragatnaşyk ministrliginiň hem-de beýleki esasy ministrlikleriň wekillerinden düzülen wekiliýet okuw sapary bilen Estoniýa Respublikasynda boldy. Bu sapar BMG-niň Ösüş Maksatnamasy (BMGÖM) bilen Türkmenistanyň Aragatnaşyk ministrliginiň bilelikdäki «Türkmenistanda döwlet edaralarynyň arasyndaky elektron arabaglanyşygyň özbaşdak ulgamyny ornaşdyrmaga ýardam bermek» atly taslamasynyň çäginde guraldy.  Türkmenistanyň wekiliýeti dünýäde giňden ykrar edilen Estoniýanyň sanly öwrülişik modeli bilen tanyşdy. Tanyşlykda aýratyn üns «X-Road» platformasyna — elektron dolandyryş üçin ygtybarly we sazlaşykly esasa gönükdirdi. Estoniýanyň tejribesi türkmen wekiliýetine sanly şahsyýet, «X-Road» arhitekturasy, kiberhowpsuzlyk, maglumat dolandyryşy we döwlet bilen hususy pudagyň hyzmatdaşlygynyň orny baradaky möhüm maglumatlary berdi. Saparyň dowamynda döwlet hyzmatlarynda emeli aňyň ulanylmagy, «e-Residency» we «eID» ýaly serhetara çözgütler, şeýle hem «Ýaşyl» maglumatlary gaýtadan işlemek merkezi» atly durnukly infrastruktura görkezildi diýip, BMGÖM-iň metbugat beýanatynda bellenilýär. Wekiliýetiň agzalary üçin öňdebaryjy eston hünärmenleri tarapyndan giňişleýin okuw sapaklary geçirildi, sanly hyzmatlaryň integrirlenen görnüşleri we hakyky tejribeler tanyşdyryldy. BMGÖM-niň goldawy bilen Türkmenistanyň on sany ministrliginde Elektron maglumat alyş-çalyş ulgamynyň üstünlikli ornaşdyrylmagyndan hem-de 12 maglumat ulgamynyň oňa integrirlenmeginden soň, bu okuw sapary milli mümkinçilikleri giňeltmäge, sanly hyzmatlary kämilleşdirmäge gönükdirildi. Alnan bilimleriň we tejribäniň ýurtda sanly ulgamyň ösdürilmegine hem-de Türkmenistanda döwlet hyzmatlarynyň sanly görnüşde kämilleşdirilmegine möhüm goşant goşmagyna garaşylýar. BMGÖM-iň Türkmenistanyň bilen hyzmatdaşlygynyň çäginde amala aşyrylýan bu başlangyç ýurtda Sanly ykdysadyýeti ösdürmegiň 2019 — 2025-nji ýyllar üçin Konsepsiýasyny we 2021 — 2025-nji ýyllar üçin Döwlet maksatnamasyny goldap, ýurtda sanly öwrülişigini çaltlandyrmaga, maglumat-aragatnaşyk infrastrukturasyny ösdürmäge, döwlet hyzmatlaryny sanlylaşdyrmaga, kiberhowpsuzlygy berkitmäge we innowasion ösüşi höweslendirmäge ýardam berýär.

Nýu-Ýork şäheri, 2025-nji ýylyň 23-nji sentýabry.

Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ir bilen Aşgabadyň Atçylyk sport toplumyna bardy. «Watan» habarlar gepleşiginde habar berlişi ýaly, Gahryman Arkadag bu ýerde ýurduň durmuşynda möhüm ähmiýeti bolan mukaddes Garaşsyzlygyň şanly baýramçylygyna görülýän taýýarlyk işleri we toplumyň döwrebaplaşdyrylyş derejesi bilen tanyşdy. Aşgabadyň Atçylyk sport toplumynda Garaşsyzlygyň 34 ýyllyk baýramçylygyna taýýarlyk işleri ýokary derejede ýerine ýetirildi. Toplumyň döwrebaplaşdyrylmagy onuň keşbine özboluşly öwüşgin çaýdy. Atçylyk sport toplumynyň ähli çägi häzirki zaman talaplaryna we ýokary ekologiýa derejesine laýyklykda döwrebaplaşdyryldy. Halk Maslahatynyň Başlygy bu ýerde amala aşyrylan işleriň derejesi bilen gyzyklanyp, olaryň baýramçylyk dabaralaryny guramaçylykly geçirmekde, toý çapyşyklarynyň ýokary derejesini üpjün etmekde ähmiýetlidigine ünsi çekdi. Gahryman Arkadag toplumyň ekologiýa ýagdaýynyň yzygiderli gözegçilikde saklanmalydygyny belläp, bu ýerde döredilýän gök zolaklaryň ugurdaş desgalar bilen bir bitewi sazlaşygy emele getirmegi babatda özüniň öwüt-nesihatlaryny berdi. Türkmen halkynyň Milli Lideri baýramçylyk at çapyşyklary mynasybetli guralýan dabaralaryň medeni maksatnamasynyň hemmetaraplaýyn esasda taýýarlanylmalydygyna ünsi çekip, baýramçylyk günlerinde ýaýbaňlandyrylýan çykyşlaryň ahalteke bedewleriniň şöhratynyň özboluşly senasyna öwrülmelidigini belledi. Şeýle hem Gahryman Arkadag toplumyň ýörite meýdançasynda Hanbeg atly bedewe atlanyp, aýlawyň çäginde gezim etdi we çapuw ýodasynyň derejesi, oňa düşelen çägäniň ýagdaýy bilen gyzyklandy. Halk Maslahatynyň Başlygy ýurduň seýisleriniň we atşynaslarynyň jemlenip, toplumyň çapuw ýodasynyň derejesi bilen baglanyşykly meseleleri ara alyp maslahatlaşmaklarynyň zerurdygyna ünsi çekdi we bu babatda degişli ýolbaşçylara özüniň öwüt-nesihatlaryny berdi. Türkmen halkynyň Milli Lideri, Halk Maslahatynyň Başlygy Gurbanguly Berdimuhamedow Türkmenistanyň Prezidentiniň Ahalteke atçylyk toplumyna hem bardy. Häzirki wagtda bu ýerde-de döwrebaplaşdyryş işleri dowam edýär. Gahryman Arkadag toplumda alnyp barylýan işler bilen gyzyklanyp, bu ýerde bedewler, atbakarlaryň netijeli işiniň üpjün edilmegi üçin ähli zerur şertleriň döredilmelidigine ünsi çekdi.

Türkmenistan 2028-nji ýyly «Halkara hukugyň ýyly» diýip yglan etmegi teklip edýär. Bu başlangyjy Türkmenistanyň Prezidenti Serdar Berdimuhamedow BMG-niň Baş Assambleýasynda eden çykyşynda öňe sürdi. Bellenilişi ýaly, Türkmenistan halkara hukugyň ileri tutulmagy hem-de halkara işlerde BMG-niň eýeleýän merkezi ornunyň güýçlendirilmegi ugrunda üýtgewsiz çykyş edýär. Bu başlangyç halkara hukugyň durnuklylygyny pugtalandyrmakda, BMG-niň Tertipnamasyna ileri tutulmagyny üpjün etmekde onuň ornuna ünsi çeker. 2028-nji ýylyň «Halkara hukugyň ýyly» diýip yglan edilmegi parahatçylygyň we hyzmatdaşlygyň halkara hukuk esaslaryny pugtalandyrmakda möhüm ädim bolar.