Türkmenistanyň Germaniýa Federatiw Respublikasyndaky Konsullygy (Maýn boýundaky Frankfurt ş.) tarapyndan Halkara parahatçylyk we ynanyşmak ýylyna, şeýle hem Türkmenistanyň hemişelik Bitaraplygynyň 30 ýyllygyna bagyşlanan medeni çäre geçirildi. Bu barada Türkmenistanyň DIM-niň resmi saýtynda habar berildi.

Habarda bellenilişi ýaly, çärä diplomatlar, işewürler toparynyň wekilleri, türkmen diasporasynyň agzalary hem-de talyp ýaşlar gatnaşdylar.

Çäräniň dowamynda konsul M.Ozbekbaýew çykyş edip, Türkmenistanyň hemişelik Bitaraplyk derejesiniň ähmiýeti hem-de ýurduň parahatçylyk döredijilik başlangyçlary barada giňişleýin gürrüň berdi.

Çäräniň çäklerinde kitap sergisi guraldy. Şeýle hem Türkmenistanyň Prezidenti Serdar Berdimuhamedowyň «Magtymguly — dünýäniň akyldary» atly kitabynyň, şeýle hem türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň «Hakyda göwheri» atly filosofiki eseriniň tanyşdyrylyş dabarasy geçirildi. Çärä gatnaşyjylar bu neşirlere ýokary baha berip, olaryň Türkmenistanyň ruhy-medeni gymmatlyklarynyň halkara derejesinde wagyz edilmegindäki ähmiýetini bellediler.

Çäräniň ahyrynda myhmanlara türkmen milli tagamlary hödürlenildi diýlip, habarda bellenilýär.