Dünýä halklarynyň arasynda “Nirede deňiz bar bolsa, şol ýerde söwda – täjirçilik ösendir” diýen jümle müňýyllyklardan bäri ýörgünlidir. Türkmenbaşy Halkara deňiz porty Ýewropadan Aziýa, Aziýadan Ýewropa ýük daşalýan ýollaryň çatragynda ýerleşip Merkezi Aziýanyň “Deňiz derwezesi” bolup durýandygy üçin, sebitde iň bir amatly logistika merkezleriniň biri hökmünde ösýär we kämilleşýär.

                   Hormatly Prezidentimiziň baştutanlygynda ýurdumyzyň ykdysadyýetiniň çalt ösmegini şol sanda eksport we import üçin ýükleriň mukdarynyň köpelmegini, şeýle hem dürli pudaklarda bäsdeşligiň ýokarlanmagyny göz öňünde tutup, deňiz ulagy pudagynyň ösüş depgini ýokarlandyrjak taslamalary durmuşa geçirmek üçin çäreler görülýär.

Deňizçilik orta hünär okuw mekdebi geljekde deňizçilik ulgamynyň durli ugurlarynda zähmet çekjek hünärmenleri taýýarlaýar.Deňizçilik orta hünär okuw mekdebinde gämi sürüjilik, gämi energetiki gurluşlarynyň ulanylyşy, energiýa hojalygy we elektrik üpjünçiligi, gämi gurluşygy, ykdysadyýet we meýilnamalaşdyryş, buhgalterçilik hasaba alnyşy we audit, jemgyýetçilik iýmitiniň önümleriniň tehnologiýasy, tehnologik prosessleriň we önümçilikleriň awtomatizasiýasy, logistikada operasion işi, myhmanhana hyzmatlary, maglumaty gorap saklamagyň tehnologiýasy we ony guramak, töwerekleýin gurşap alýan tebigaty gorap abadanlaşdyrmak hünärleri boýunça okuwlar alnyp barylýar.

         Adatça her ýylyň tomus möwsüminde talyplary ýörite gurnalan okuw-tejribeliklerine ýollanylýar. Okuw jaýynyň II ýyllyk talyplary  Türkmenbaşy Halkara deňiz portunda, “Balkan” gämi gurluşygy we abatlaýyş zawodynda we Deňiz söwda flotunda şeýle hem beýleki dürli edara-kärhanalarda özleriniň tejribeliklerini geçýärler. Bu gurnalýan tejribelikler talyplaryň okuw jaýynda alan nazary bilimlerini, tejribeliklerde berkitmeklerine örän uly ähmiýet berýär.Okuw jaýynyň I ýyllyk talyplarynyň tejribeliklerini bolsa ýörite meýilnamalar esasynda, okuw jaýynda geçilýär.  Şular ýaly okuwlaryň gurnalmagy geljekde täze tehnologiýalardan, innowasion enjamlardan baş çykarýan, olara erkin erk edip bilýän hünärmenleriň ýetişmegine getirýär.

         Hormatly Prezidentimiziň saýasynda giň gözýetimli, häzirki zaman tehnologiýalardan peýdalanmagy başarýan, watansöýüji, beden we ruhy taýdan sagdyn ýaşlary terbiýeläp ýetişdirmäge gönükdirilen umumy bilim edaralarynyň dowamly ösdürilmegi amala aşyrylýar.

         Geljegimiz bolan ýaşlara uly umyt baglaýan Hormatly Prezidentimiziň jany sag, başy dik, il-ýurt bähbitli alyp barýan işleri rowaçlyklara beslensin!