Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 4 ýyllygy mynasybetli Arkadag şäherinde geçirilen «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahatyň çäklerinde gaznanyň bejeriş işleri boýunça wise-prezidenti O.Atabaýewa bu çärä gatnaşmak üçin Türkmenistana gelen Özbegistan Respublikasynyň Prezidentiniň kömekçisi Saida Mirziýoýewa bilen duşuşdy. Bu barada 29-njy martda «Watan» habarlar gepleşiginde habar berildi.

Bellenilişi ýaly, duşuşygyň barşynda taraplar çagalaryň saglygyny goramak babatda hyzmatdaşlyga degişli köp sanly meseläni ara alyp maslahatlaşdylar. Hususan-da, howandarlyga mätäç çagalara lukmançylyk kömegini we goldaw bermek babatynda tejribe alyşmak meselesine aýratyn üns berildi.

Özbegistan Respublikasynyň Prezidentiniň kömekçisi Türkmenistanyň saglygy goraýyş ulgamyny ösdürmekde gazanan üstünliklerine haýran galýandygyny, lukmançylyk edaralarynyň ýokary derejesini we olarda lukmançylyk kömegini bermek babatda innowasion çemeleşmeleriň ýola goýlandygyny belläp geçdi. Myhman özbek tarapynyň tejribe alyşmaga we çagalaryň saglygyny berkitmäge gönükdirilen bilelikdäki taslamalary durmuşa geçirmäge taýýardygyny aýtdy.

Taraplar Türkmenistan bilen Özbegistanyň halklarynyň arasynda taryhy taýdan ýola goýlan dost-doganlyk gatnaşyklarynyň dürli ugurlarda özara peýdaly hyzmatdaşlygy has çuňlaşdyrmak we giňeltmek üçin berk esas bolup durýandygyny bellediler.

Şeýle-de duşuşykda bilelikdäki tagallalaryň netijesinde çagalaryň hukuklaryny we bähbitlerini goramakda, ýaş nesliň saglygyny berkitmekde möhüm üstünlikleriň gazanyljakdygyna ynam bildirildi.