Ozal habar berşimiz ýaly, şu gün Türkmenistanyň Prezidenti Serdar Berdimuhamedow Ministrler Kabinetiniň we Döwlet howpsuzlyk geňeşiniň giňişleýin mejlisini geçirdi. Oňa welaýatlaryň we Aşgabat şäheriniň häkimleri hem gatnaşdylar.

«Watan» habarlar gepleşiginde habar berlişi ýaly, Türkmenistanyň Prezidenti mejlisiň dowamynda oňa gatnaşan ýolbaşçylara Täze ýylyň baýram edilýän günlerinde ähli gulluklarda nobatçylygyň tertibini ýola goýmagy, baýramçylyk günlerinde jemagat hojalygynyň, elektrik we suw üpjünçilik gulluklarynyň, bejeriş, öňüni alyş edaralarynyň bökdençsiz işledilmegini üpjün etmegi tabşyrdy. Şeýle hem döwlet Baştutany bazarlarda we dükanlarda dürli görnüşli harytlaryň bolçulygyny has-da üpjün etmegi, baýramçylyk günlerinde raýatlaryň gowy dynç almagy üçin medeni çykyşlary guramagy, şäherlerde we obalarda jemgyýetçilik ulaglaryň kadaly gatnamagyny üpjün etmegi, Täze ýyl baýramçylygy günlerinde ähli ýerde tertip-düzgüniň pugta berjaý edilmelmegini gözegçilikde saklamagy tabşyrdy.

Mejlisiň ahyrynda Türkmenistanyň Prezidenti hemmeleri täze 2026-njy ýyl bilen tüýs ýürekden gutlady we geljek ýylda türkmen halkynyň ýaşaýyş-durmuş şertlerini has-da gowulandyrmak, berkarar döwleti ösdürmek ugrunda alyp barjak işlerinde uly üstünlikleri arzuw etdi.