Balkan welaýatynda öndürilýän ekerançylyk we maldarçylyk önümleriniň möçberleri, olaryň senagat taýdan gaýtadan işlenilip, ýokary hilli harytlyk görnüşine getirilişi hem ýylsaýyn artýar. Bu barada «Türkmenistan» gazetinde habar berildi. Şu ýylyň geçen döwründe welaýat boýunça 14 milliard 12 million manatlykdan gowrak önüm öndürildi. Habarda bellenilişi ýaly, bu babatdaky ösüş 104,2 göterime deň boldy. Munuň agramly bölegi-de oba hojalyk pudagyna degişlidir. Welaýatyň ýaşaýjylary et, süýt, ýumurtga, gök önümler, miwelerdir ir-iýmişler bilen bökdençsiz üpjün edilýär. Ýeralmanyň, pomidoryň, hyýaryň, soganyň, bakja ekinleriniň bol hasyly ýygnalyp, halka ýetirilýär. Şu günler bolsa Garagum derýasynyň ýakasyndaky ekin meýdanlarynda geljek ýylyň bol hasyly üçin güýzlük bugdaý ekişine, şonuň bilen birlikde-de, şu ýyl ösdürilip ýetişdirilen gowaçadan pagta hasylyny ýygnamak işlerine üstünlikli girişildi.

Mary welaýatynyň Sakarçäge etrabynyň Akýap geňeşliginde täze 17-nji çagalar bakja-bagy açylyp ulanmaga berildi. Bu barada «Türkmenistan» gazetinde habar berildi. Habarda bellenilişi ýaly, iki gatdan ybarat bu binanyň açylyş dabarasyna etrabyň ýaşaýjylary, bilim işgärleri, Mejlisiň deputatlary, ýaşuly nesliň wekilleri, bagtyýar körpeler gatnaşdylar. Çagalar bakja-bagyny Mary welaýat häkimliginiň Düýpli gurluşyk müdirliginiň buýurmasy esasynda Türkmenistanyň Senagatçylar we telekeçiler birleşmesiniň agzasy bolan «Bally» hojalyk jemgyýeti bina etdi. Myhmanlar bakja-bagynyň otaglarynda körpelere döwrebap bilim, terbiýe bermek, olaryň rahat dynç almaklary üçin döredilen şertler bilen tanyşdylar. Çagalar bagynyň okuw hem ýatylýan otaglary körpeleriň ilkinji ýazuw we okuw endiklerini öwrenmekleri, rahat dynç almaklary üçin birkemsiz enjamlaşdyrylypdyr. Lingafon, kompýuter, daşary ýurt dilleri we beýleki otaglar sanly serişdelere daýanýan enjamlar bilen üpjün edilipdir. Çagalar bakja-bagyndaky bedenterbiýe otagy, ýapyk howuz körpeleriň sagdyn bolmagyna ýardam berer. Binanyň ýanaşyk ýerinde çagalar bakja hem bag toparlary üçin 16 sany oýun meýdançasy gurlup, olar körpeleriň ýaş aýratynlyklaryna görä, dürli oýnawaçlar bilen enjamlaşdyrylypdyr.

Şu gün Arkadag şäheriniň Magtymguly Pyragy köçesiniň ugrunda ýerleşýän, ähli amatlyklary bolan 9 gatly, 54 öýli döwrebap ýaşaýyş jaýynyň açarlarynyň gowşurylyş dabarasy geçirildi. Bu barada «Watan» habarlar gepleşiginde habar berildi. Bellenilişi ýaly, dabara mynasybetli Arkadag şäheriniň Aman Gulmämmedow adyndaky döwlet drama teatrynyň artistleri, Sahy Jepbarow adyndaky Arkadag şäheriniň ýörite sungat mekdebiniň talyplary aýdym-sazly, tansly çykyşlary ýerine ýetirdiler. Şeýle hem türkmen toýunyň däp-dessurlary dabaralandyryldy. Şu gün Arkadag şäheriniň Gurbannazar Ezizow köçesiniň ugrunda ýerleşýän, ähli amatlyklary bolan döwrebap kottej jaýlarynyň açarlarynyň gowşurylyş dabarasy-da boldy. Täze şäherde ýurduň Garaşsyzlygynyň şanly 34 ýyllyk baýramy mynasybetli «Dünýä gözelliklerini zenanlar wasp edende» ady bilen keramikaçy gelin-gyzlaryň döredijilik sergisi hem ýaýbaňlandyryldy. Sergi Arkadag şäheriniň Taryhy we ülkäni öwreniş muzeýinde guralyp, keramikaçy gelin-gyzlaryň döredijilik işlerinde türkmen halkynyň baý milli gymmatlyklary hem-de nusgawy medeni mirasy görkezildi. Bu günki wakalar bilen baglylykda we ýurduň Garaşsyzlygynyň şanly 34 ýyllyk baýramy mynasybetli, täze şäherde toý sadakasy hem berildi.