Türkmenistanyň Prezidenti Serdar Berdimuhamedow Şanhaý hyzmatdaşlyk guramasynyň (ŞHG) agza ýurtlaryna gämi gurluşygy boýunça hyzmatdaşlyk etmek teklibini hödürledi. Bu barada TDH agentligi habar berýär. «Deňizüsti ýük daşamalar barada aýdylanda, biziň pikirimizçe, gämigurluşyk pudagynda hyzmatdaşlygyň ýola goýulmagy ýerlikli bolardy. ŞHG ýurtlarynyň köpüsiniň bu ugurda uly önümçilik kuwwatlyklary we baý tejribesi bar. Türkmenistan hem milli gämigurluşyk pudagyny işjeň ösdürýär. Bu ugurdaky hyzmatdaşlyk özara bähbitleri getirer diýip hasaplaýaryn» — diýlip, habarda nygtalýar. ŞHG-niň sammiti 2025-nji ýylyň 31-nji awgustyndan 1-nji sentýabryna çenli Hytaýyň Týanszin şäherinde geçirildi. Oňa 20-den gowrak ýurtlaryň döwlet baştutanlary hem-de halkara guramalarynyň wekilleri gatnaşdylar.

Prezident Serdar Berdimuhamedow Şanhaý Hyzmatdaşlyk Guramasynyň sammitinde Türkmenbaşy Halkara deňiz portunyň mümkinçiliklerine ünsi çekip, Türkmenistanyň bu köpugurly we kuwwatly terminalyň Şanhaý Hyzmatdaşlyk Guramasynyň bähbitlerine ulanylmagy baradaky dialoga taýýardygyny tassyklady. Bu barada TDH habar berýär. «Türkmenbaşy Halkara deňiz portunyň mümkinçiliklerine ünsüňizi çekmek isleýärin. Biz bu köpugurly we kuwwatly terminalyň Şanhaý Hyzmatdaşlyk Guramasynyň bähbitlerine ulanylmagy baradaky dialoga taýýardyrys» diýip, Türkmenistanyň Prezidenti çykyşynda nygtady. Prezident Serdar Berdimuhamedowyň bellemegine görä, ägirt uly serişde binýady, geografik taýdan ýerleşmegiň artykmaçlyklary, senagatyň we infrastrukturanyň çalt depginler bilen ösmegi, özara hyzmatdaşlygyň toplanan tejribesi — bularyň ählisi ykdysady taýdan ýakynlaşmaga, bilelikde ösmäge, bar bolan mümkinçilikleri durmuşa geçirmäge, ŞHG-niň giňişliginde we Türkmenistanyň çäginde yklym, geljekde bolsa ählumumy ähmiýetli iri ykdysady merkezleri döretmäge ýardam berýär. Döwlet Baştutany Türkmenistanyň we ŞHG-niň hyzmatdaşlygynyň dürli formatlarynyň we nusgalarynyň ikitaraplaýyn gatnaşyklaryň üstüni ýetirmäge hem-de baýlaşdyrmaga, hyzmatdaşlygy uzak möhletli, özara bähbitli esasda giňeltmäge, iri sebit we halkara taslamalary meýilleşdirmek hem-de durmuşa geçirmek üçin şertleri döretmäge ukyplydygyna berk ynam bildirdi. Türkmenistanyň Prezidenti ulag ugruna aýratyn ünsi çekdi. «Häzirki wagtda ŞHG ýurtlarynyň we Türkmenistanyň esasy merkezleri bolup biljek Gündogar — Günbatar, Demirgazyk — Günorta ugurlar boýunça logistika magistrallaryny ýola goýmak üçin anyk mümkinçilikler bar diýip hasaplaýarys. Tagallalaryň we mümkinçilikleriň birleşdirilmegi, syýasy-diplomatik, ykdysady serişdeleriň herekete getirilmegi diňe bir hyzmatdaşlygymyzyň ösüşinde hil taýdan täze tapgyry alamatlandyrman, munuň özi iri we okgunly ösýän ykdysady zolaklary — Aziýa — Ýuwaş umman sebitini, Merkezi we Günorta Aziýany, Russiýany, Orta we Ýakyn Gündogary öz içine alýan, Ýuwaş ummandan Baltika deňzine çenli uzaýan bitewi geoykdysady giňişligi kemala getirmek üçin şertleri döretmäge ukyply bolar» diýip, döwlet Baştutany aýtdy hem-de Türkmenistanyň we ŞHG-niň gatnaşmagynda has ýakyn özara hyzmatdaşlygyň ýola goýulmagynyň, Türkmenistanyň we ŞHG-niň obýektiw artykmaçlyklaryny, özara bähbitlerini, ählumumy geoykdysadyýete üstünlikli goşulyşmagyny nazara almak bilen, ulag strategiýalarynyň utgaşdyrylmagynyň maksadalaýyk boljakdygyny nygtady. Prezident Serdar Berdimuhamedow bu babatda Hazarüsti we Hazarýaka ulag ugurlaryny aýratyn belledi. «Biz gurama hökmünde ŞHG-niň hem-de Türkmenistanyň bu ugurda bähbitleriniň gabat gelýändiginden, onuň özara gabat gelmegiň ýokary derejesine eýediginden ugur alýarys. Olary iş ýüzünde durmuşa geçirmek biziň umumy wezipämiz diýip hasaplaýaryn. Hazar arkaly ulag geçelgelerine biziň ykdysady we önümçilik mümkinçiliklerimiziň netijeliligini düýpli ýokarlandyrmak, dünýä bazarlaryna doly derejede çykmak, Ýewraziýa geoykdysady giňişliginde uzak möhletli we güýçli ornumyzy pugtalandyrmak üçin anyk mümkinçilik hökmünde garaýarys. Hazar deňzinde ýük daşamalar üçin amatly syýasy-hukuk gurşawyny döretmek hem möhüm ugurdyr. Munuň özi Şanhaý Hyzmatdaşlyk Guramasyna agza döwletleriň Hazar deňzinde söwda we ykdysady işlerine gatnaşmaklary üçin gowy mümkinçilikleri açýar» diýip, türkmen döwletiniň Baştutany aýtdy.

Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň gatnaşmagynda Aşgabat şäherinde Halkara senagatçylar we telekeçiler uniwersitetiniň açylyş dabarasy boldy. Bu barada «Watan» habarlar gepleşiginde habar berildi. Bellenilişi ýaly, Gahryman Arkadag, ilki bilen, Halkara senagatçylar we telekeçiler uniwersitetiniň öňündäki meýdançada aýdym-saz we tans toparlarynyň şowhunly çykyşyna tomaşa etdi. Soňra Türkmenistanyň Halk Maslahatynyň Başlygy bu ýerde açylyş dabarasy mynasybetli Gutlag sözi bilen çykyş etdi. Halkara senagatçylar we telekeçiler uniwersitetiniň açylyş toý bagyny kesip, uniwersitetiň edara binasyna girensoň, türkmen halkynyň Milli Lideri täze ýokary okuw mekdebiniň eýwanynda diwarlaryň ýüzünde mozaika görnüşinde ýerine ýetirilen, gadymyýetdäki türkmen täjirlerini we häzirki döwürde türkmen telekeçileriniň dürli ugurlarda, şol sanda ylymda, bilimde, innowasiýa häsiýetli ýokary tehnologiýalarda ýeten sepgitlerini beýan edýän surat eserlerini synlady. Gahryman Arkadag uniwersitetiň barlag-tejribehana otaglaryna baryp gördi we ýokary hilli, döwrebap enjamlar bilen üpjün edilen otaglarda döredilen şertler bilen tanşyp, talyplaryň amaly okuw sapaklaryny geçýän pursatlaryna syn etdi. Halk Maslahatynyň Başlygy Halkara senagatçylar we telekeçiler uniwersitetiniň howlusynda guralan, Türkmenistanyň Senagatçylar we telekeçiler birleşmesiniň agzalarynyň öndürýän milli önümleriniň sergi pawilýonlary bilen hem tanyşdy. Türkmen halkynyň Milli Lideri täze uniwersitetiň rektoryna Türkmenistanyň Prezidentiniň adyndan sowgat berilýän täze awtoulaglaryň açarlaryny gowşurdy. Soňra türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Halkara senagatçylar we telekeçiler uniwersitetiniň mejlisler zalynda açylyş dabarasyna gatnaşyjylaryň, mugallymlaryň we talyplaryň öňünde beýanat bilen çykyş etdi. Bu ýerde uniwersitetiň rektoryna Halkara senagatçylar we telekeçiler uniwersitetine berlen halkara güwänamalardyr ýörite baýraklar gowşuryldy. Halk Maslahatynyň Başlygy bu ýerde Hormatly myhmanlaryň kitabynda ýadygärlik ýazgysyny galdyrdy. Gahryman Arkadagdan Halkara senagatçylar we telekeçiler uniwersitetiniň agzybir işgärleriniň hem-de talyp ýaşlarynyň adyndan sowgat berilýän ajaýyp türkmen halysyny Türkmenistanyň Prezidentine gowşurmagy haýyş edildi.