Watan goragçylarynyň güni mynasybetli 24-nji ýanwarda Türkmenistanyň Goranmak ministrliginiň harby bölüminiň täze desgalar toplumy we ýaşaýyş-durmuş maksatly binalary dabaraly ýagdaýda açylyp ulanylmaga berildi. Açylyş dabarasyna serkerdeler hem-de çagyryş boýunça harby gullukçylar gatnaşdylar. Bu barada «Watan» habarlar gepleşiginde habar berilýär.

Halkara parahatçylyk we ynanyşmak ýylynda Watan goragçylarynyň gününe uly ruhubelentlik bilen barylýan günlerde Türkmenistanyň Goranmak ministrliginiň harby bölüminiň täze desgalar toplumynyň we ýaşaýyş-durmuş maksatly binalarynyň açylmagy merdana Watan goragçylary üçin ajaýyp baýramçylyk sowgady boldy.

Toplum dolandyryş binasyny, medeniýet öýüni, lukmançylyk nokadyny, esgerler ýatakhanasyny we naharhanasyny, sport meýdançasyny öz içine alýar.

Dabaranyň dowamynda Türkmenistanyň Ýaragly Güýçleriniň harby gullukçylarynyň ýerine ýetiren aýdym-sazly çykyşlary baýramçylyk şatlygyny goşalandyrdy. Harby bölümiň täze binalar toplumynyň çäginde gurlan iki sany 2 gatly, 64 öýli döwrebap ýaşaýyş jaýlarynyň açylyp ulanmaga berilmegi hem Watan goragçylary üçin ajaýyp baýramçylyk sowgady boldy.

Toplumyň çäginde ýerleşýän sport meýdançasynda-da çagyryş boýunça harby gullukçylar sagdyn durmuş ýörelgesine eýerip, ýurt goragyny birkemsiz alyp barmak üçin özlerini beden taýdan kämilleşdirýärler. «Çeper gurluşyk» hususy kärhanasy tarapyndan gurlan desgalaryň ýanaşyk ýerleri hem göwnejaý abadanlaşdyrylypdyr. Täze binalar bilen tanyşlykdan soňra, harby bölümiň serkerdesine Türkmenistanyň Prezidentiniň adyndan döwrebap awtoulaglaryň açarlary gowşuryldy.